فيه رأيين لحد دلوقتي شفتهم عن ترشح عمر سليمان :
الأول: إن الهدف من ترشحه هو إلهاء الناس عن المرشح الرئيسي للعسكر
التاني: إن الهدف من ترشحه هو إنه فعلا يكسب و يبقي رئيس مصر
بالنسبة للرأي الأولاني فهو فعلا فيه شئ من الصحة بس في نفس الوقت الهدف ده- اللي هو الهاء الناس يعني - معرض للفشل بطريقة كبيرة و خصوصا مع جولة الإعادة في الإنتخابات و عشان كده مش ده الهدف الرئيسي من ترشح سليمان.
أما بالنسبة للرأي التاني فاأنا شايف إن المجلس العسكري مش ساذج لدرجة إنه يصدق إن عمر سليمان ممكن يبقي رئيس عادي كده لأنه عارف كويس إن لو عمر سليمان كسب أو حتي دخل الإعادة الناس حتنزل عشان تسقطه ، طب السؤال هنا هو ليه المجلس بيظهر تأييده لعمر سليمان حتي لو بشكل غير رسمي (زي أما شوفناه كده في وسط حماية الشرطة العسكرية) ؟
طبعا عشان يحسسونا إن سليمان ليه وزن و ممكن يخلوه يكسب بجد (خطر يعني) ، عند الحته دي من الكلام ((اثبت مكانك)) و فكر شوية
.
.
.
.
هما ليه عاوزينا نحس إنه خطر حقيقي ؟
بكل بساطة كده احنا بنتعامل مع عقليات عسكرية تقليدية بتفكر بطريقة عسكرية بحته و من أبسط المبادئ العسكرية إن أي جيش له خطوط دفاع ثابتة أو متغيرة ، طبيعية أو مصطنعة.
عندنا سينا مثال للحكاية دي فيها تلت خطوط دفاع منهم خط الدفاع الطبيعي اللي في وسط سينا و هو عبارة عن سلاسل جبال عاملة زي المتاهة بتنهك قوة أي فرق مشاة او مدرعات بتعدي منها ، عمر سليمان عامل زي المتاهة دي بقي بالظبط الغرض من وجوده إنه يبقي زي ما بيقولوا كده (في وش المدفع) يمتص الصدمة و الغضب و الثورة عند الناس ، بمعني إن لو عمر سليمان دخل الإعادة أو كسب و الشعب خرج عشان يسقطه و عرف فهتبقي قوة الثورة و قدرتها علي الحشد في فترة مهمة زي دي نقصت ، و ده لأن الناس هتحس أنها عملت حاجة كبيرة اوي بإسقاطهم لسليمان فاحيهدوا و حيأنتخوا و أي حد يقولهم ياجماعة محاكمة العسكر يا جماعة فصل المشروعات الإقتصادية المدنية عن وزارة الدفاع حيقولوله: الإستكرار.....الإستكرار ، و لو مش مصدقين فالماضي مش بعيد ،
وعندكم مثلا احداث محمد محمود فيه ناس كتير مشيت بعدما حكومة شرف اتشالت مع إن ده ماكانش المطلب الرئيسي أصلا.
عشان كده المفروض نحط في اعتبارنا كويس إن عمر سليمان مجرد خط دفاع للعسكر بيقللوا بيه قوة الثورة مش أكتر ، لازم بقي الفترة دي و لشهرين قدام بإذن الله نفكر إزاي نعديه بأقل مجهود و بأقل إستهلاك لقوي الثورة.
K.S
